حوران

صليت قبل الضو وقريت قرآن اتنحنحت ولديت من جانب الدار

ونو الشمس ظيفة وادق بيبان ياميت هلا بللي لنا زار

اسقيتها فنجان من بعد فنجان مهيل ومسحون ومغلي على النار

سألتها شلون الكل وشلون لوطان وشلون الناس صغار وكبار

شلون أبو داهود وشلون حمدان شلون أبو باير وحسين الدوار

شلون ترفه وبيكه وأم جروان شلون لزمه زمله وأم زنار

شلون المذاري والكرابيل والران ولقرب بقاع الدار والكشك والكار

والثور لبرق ولجدايا ولحصان والسهل والقش وشلون لحمار

خابر غظيه عالصبح اترق رغفان أطيب على الجوعان من هيل وبهار

ماعاد شفت نعاج تسرح بوديان وماعاد شفت رقيطه وشوك ومرار

ومافيش دراسين ومافيش تبان ومافي حدادي ع البيادر ولا شعار

ومافيش جنايات والبر عطشان عكوب مع جعده ومقره ونوار

شو صار ياحوران يا كل حوران يا أم المنازل والزلازل ولمطار

كنتي تلفي الناس زلم ونسوان لجل الحصيدة والرجيده والبذار

العرس كان يرج وتثور نيران ميحه وجوفيه دبكات وطوار

الزغاريت تهز شيب وشبان كل ما خلص طاروق ينادوه ما صار

جمال العرب ما عاد تلفي وعربان طشت وليل يشطح بها مع نهار

يابو يزن وين الجزل ليش همدان والحرمل المدقوق والصر والغار

يابو يزن ياريت ترجع لنا ازمان يصير الوطن بالدم مش طين وحجار

الشاعر : عبدالكريم الحمصي